Уникаль мөмкинлек: дистәләгән илдә кулланылган гарәп клавиатурасын ясаган Мөхәммәд Идрисов тарихы белән танышыгыз. Лекция Татар китабы йортының балконында узачак.
Мөхәммәд Идрисов — язу машиналары өчен гарәп шрифтын барлыкка китергән, карталар һәм глобуслар ясаган, математика һәм физика дәреслекләре язган даһи. Яшьрәк чагында ул хикәяләр дә иҗат итә һәм Тукай, Әмирханнар белән аралаша.
1935-1936 елларда ул каракалпак, кыргыз, карачай-балкар, төркмән, үзбәк, уйгыр, хакас, якут, осетин-иран, осетин-туал, талыш, тат, абхаз, адыгей, ингуш, чечен, табасаран, бурят-монгол, коми-пермяк, көрт, кабардин, дунган, таҗик, авар, даргин, лакс, лезгин, кумык, ногай телләренең яза торган машиналар өчен клавиатурасын әзерли. Кыскасы, барысы 35 милләтне клавиатуралы итә.
Татарстан Милли музеенда бу шәхеснең ачышлары белән бәйле кызыклы экспонатлар саклана. Лекциядә М. Идриси мирасын өйрәнүче галимә, филология фәннәре кандидаты Нурия Мифтахетдинова кызыклы фактлар белән бүлешәчәк һәм кайбер экспонатларны күрсәтәчәк.
Лекция ачык һавада, Татар китабы йортының балконында узачак.